ذكرى وفاة كوكب الشرق أم كلثوم

كتب مجدى الشعراوى

ولدت ام كلثوم  فى قريه بسيطه من قرى مصر اسمها " طماى الزهايره " و حبت الغنا من صغرها فكانت بتغنى بين مروج القطن فى قريتها و سحرت الفلاحين بجمال صوتها و اتعرفت فى القرى المجاوره فابتدت تغنى فى الحفلات اللى كان بيعملها الموظفين و اشتهرت فى الاقاليم. راحت القاهره سنة 1920 ، و اعجب الموسيقيين بصوتها ، و كان منهم محمد القصبجى فشجعها بألحانه. الف ليها الشعراء احمد شوقى و احمد رامى و بيرم التونسى و غيرهم اغانى و قصايد و اناشيد، و لحن ليها الملحنيين المصريين الكبار رياض السنباطى و زكريا احمد و محمد عبد الوهاب و بليغ حمدى و سيد مكاوى. اشتركت فى كذا فيلم مصرى زى فيلم " سلامه " و شاركت بصوتها بس فى فيلم رابعه العدويه ، و اتلقبت بكوكب الشرق و ست الكل و ثومه.

غنت اناشيد و أغانى وطنيه كتيره الهبت بيها حماسة المصريين و دوى صوتها مع الأحداث اللى مرت على مصر فى عصرها فغنت " ذكرى سعد " و " منصوره يا ثورة أحرار " و " فرحة القنال " و " والله زمان يا سلاحى " و غنت " طوف و شوف " قدام جمال عبد الناصر و خورتشوف. و اتبرعت بحفلات عملتها فى باريس و فى اماكن تانيه للمساهمه فى المجهود الحربى بعد حرب 1967. كرمتها الدوله المصريه و اديتها جايزة الدوله التقديريه.

تميزت بارتدائها نظارة سوداء مع منديل في يدها، تعد واحدة من أشهر المُطربات في مصر والوطن العربي وأصبحت أيقونة مات جسدها لكن بقيت روحها خالدة في قلوب كل مُحبيها في مختلف دول العالم.

اتوفت ام كلثوم فى 3 فبراير 1975 و خرج ملايين المصريين يودعوها فى جنازه من اكبر الجنازات اللى شافتها مصر.